گەرماوی هەولێر

لەگەل ئەوەی کە لە ساڵی 1979 گەرماوەکە بەشێوەیەکی فراوان نۆژەنکراوە، بەڵام نەخشەی زەوییە رەسەنەکەی تا ئێستا ماوە. چوونەژوورەوەی (مەدخەل) سەرەکی دەمانباتە هۆڵی دەرەوە  کە  بە گومزە داپۆشراوە و پێوانەکەی 9م × 9م. لێرەوە، دەتوانین بگەینە هۆلی ناوەند، کە لەوانەیە پلەی گەرمایەکەی کەمێك گەرمتربێت؛ ئەم هۆڵە بە شێوەی چوارگۆشەیە کە پێوانەکەی 11م × 11م، سەقفەکەی لە گومزەی گەورە پێکدێت کە چەند کونی پچوکی تێدایە کە بە شووشە داپۆشراون، بۆ ئەوەی رووناکی سروشتی بگاتێ. هۆڵی ژوورەوە دەکەوێتە کۆتایی بیناکە کە وا گومان دەکرێت وەك ناوچەی گەرماوی هەڵم بەکارهاتبێت. ئاوی پێویست بۆ گەرماوەکە لە بیرێکی کۆن دابین دەکرا، قوڵاییەکەی لە 60 م زۆرترە، و تا ئێستا ماوە. گەرماوە رەسەنەکە بەردەوامبوو لە کارکردن تا نۆژەنکردنەوەی ساڵی 1979. لە ساڵی هەشتاکان بیناکە دووبارە نۆژەنکراوە.